Arquivo: Edição de 11-12-2007

Mirandês

Canto IX
Ls Lusíadas
73 Outra, nua bergonha que cumben, L cuorpo n'auga lhougo eilhi scundiu; Outra que fuora ls sous bestidos ten Apressiou-se a agarrá-los i fugiu. Hai un de ls moços que nien se deten A znudar-se i assi todo se metiu Bien bestido i calçado, que nun tarde A matar n'auga l fuogo que nel arde.

Nuite Feliç
1. Naqueilha nuite l cheiro de l quemer i l alberoto yeran más fuortes que nunca. Yá se habie afazido a coincer todo l que comien solo pul cheiro: para la cena, houbo bacalhau cozido cun batatas i tronchos. I inda fritas, que l cheiro de las fritas yera l que le atrelundaba más l santido, a chamá-lo, a puxá-lo para l sobrado, cumo se fura un bruxedo. Apuis l alberoto, que el bien çcunfiaba donde benie: la rapaza más nuoba, yá dous ou trés meses solo a arrastrar ls pies pula casa, cun la barriga ampinada, a modos a trazer uas fogaças alhá drento, preinha cumo un pelhiço an Nobembre, que nisquiera les habie deixado acabar la cena assossegados, nun sfregante, ah mai, ah mai, que you yá nun las aguanto, bénen cada beç más juntas... tengo ls quartos todos anchoquecidos!...

Yá puodes salir sien miedo
Puodes salir San Miguel Que yá nun se passa nada Anda ben sien miedo Que la lhagona stá tapada. Nien sequiera auga ten Pra molhar las tues patas Auga yá nien s’ancontra Sequiera na Fuonte de las Lhatas.