L sermon

PUB.

Ter, 19/04/2005 - 19:01

Lhougo de madrugada, mui temprano, un cura iba por un camino, pensando ne l sermon que habie de fazer ne l lhugar adonde dezie missa ua beç por sumana. Cumo inda era meio de nuite, tropeçou nun uosso dua cabeça i por poucas nun se chimpou! Bolbiu-se a mirar adonde habie tropeçado i al ber la cabeça an uosso adregou a lhebá-la cul.

Chegado a l’eigreija puso l uosso al meio de l altar adonde dezie la missa, antre dous círios a lhuzir. Al momento de la prática, l cura lhembrou-se de fazer un sermon subre la cabeça an uosso i ampeçou a dezir:
- Mirai todos bien para esta cabeça an uosso q’ancuntrei pul camino! Quien sabe se nun serie talbeç de l’alma dun buosso abó? Quien sabe se nun serie talbeç de l’alma dun buosso amigo? Quien sabe se nun serie talbeç de l’alma de buosso pai?
Anquanto iba dezindo l sermon, l uosso cuntinaba antre ls círios i yá iba meio calentico. Cumo andrento l buraco dun de ls uolhos habie un bespreiro, cula calor houbo ua biespra que saliu i picou l cura na mano. I diç lhougo el, mui agudo:
- Quien sabe se nun serie talbeç de l’alma dun raio que l parta!?
Cuntada por Alfredo Fernandes (Sendin)
Recuolha de Carlos Ferreira