Sex, 18/03/2005 - 12:53
Era ua beç dous armanos, un rapazico i ua rapazica, inda pequeinhos, que bibien nua casa grande i tenien alhá dous animales, un perro i un gato. Un die, l pai de garoticos fui cumbidado para ir a la casa dun home que el habie coincido i lhebou ls filhos. L home bibie nua quinta mi grande i tenie muitos animales, i ls garoticos alhá fúrun todos cuntentos. Quando chegórun a la quinta, quedórun ancantados cun ua perra que habie parido siete perricos. Cinco deilhes éran castanhos i ls outros dous éran brancos. Inda éran mi pequeinhos, mas tan guapos que ls dous armanos passórun toda la tarde cun eilhes, mui cuntenticos.
Apuis desse die, ls garoticos nun falában an más nada i nun habie naide que nun tubisse yá oubido la cuonta de ls siete perros. L pai yá nun ls abentaba! Ls garoticos fúrun tan malucos que l pai, anque yá tubira dous animales an casa, deixou-los scolher i quedar cun un de ls perricos. Fui custosa la scuolha! Mas la garotica solo querie un de ls brancos, que era altibo i mui cismático ... i assi fui.
Mas quando l pai pensaba que la queston staba arrimada, anganhou-se. Ls dous pequeinhos passórun dies i dies cun l perro sin saber que nome le dar: era branco, mui bien, mas nun le podien chamar Branco; tenie ua mancha negra nun uolho, mas eilhes nun gustában de Mancha, ó Spot, ó ... sei alhá! Ls dous armanos spormentórun dar-le todos ls nomes i siempre dezien que l perrico nun gustaba deilhes. Un die, i apuis de muita jolda, ls garotos lhembrórun-se de le chamar Black (negro an anglés). Era defrente, puis, an berdade, l perrico era branco, solo la mancha era negra. Mas para acabar cun ls porblemas, todos dezírun que si ... i anté dezírun que l perrico tamien gustaba de l nome.
I assi fui: ls garoticos quedórun mi cuntentos i l perrico bibiu cun eilhes muitos anhos, muitos i felizes anhos!
Marisa João