Las fornadas de la tie Angrácia

La caminada era mi lharga i tenie qu’ir amenudadas bezes a moler. Sin farina nun habie pan i sin pan parecie que faltaba todo, nun eijistie mesa sin fogaça i naide s’afazie sin la sue codica na fardela ó ne l cerron, quando se tenie qu’ir pal termo.
Tie Angrácia tenie ua família mui grande i quaije todas las semanas amassaba uma fornada de pan, cun uas dieç fogaças. Çcolgaba las baras, ponie-las na masseira cun dues penheiras anriba, ua para cada mano, i eili staba más dua hora a penheirar, anté apartar toda la farina de ls farelos. La farina strampalhaba-se pula masseira toda i ls farelos quedában na penheira que çpejaba ne l scrinho para apuis amassar a las pitas ó botar na pila de ls cochinos. Al lhume tenie ua caldeira, colgada de las lhares, chena d’auga, que calcie para amassar l pan. Tie Angrácia tenie un caçulo aonde guardaba un cachico de massa de l fornada atrasada que serbie de furmiento que, apuis de çfeito n’auga caliente, çpejaba na massa i misturaba cua castanhica de furmiento de l soto, nun buraquito que fazie ne l meio de l munton de farina. Ambolbie todo cun l’auga, amassando siempre i cun alguns buldrejones, anté la massa quedar bien trabalhada para que l pan quedasse buono. Cun un niquito de farina çpegaba-se ls pegotes de massa de la manos, rapaba la masseira cun la rapadeira, ajuntaba la massa nua puonta de la masseira i eili quedaba a drumir, tapadica cul lhençol de lhino i cun las mantas anté lhebedar.Quando la massa ampeçaba a quedar spierta i a stender-se pula masseira, habie que arrojar l forno para que l pan quedasse bien cozido i cun bun suolo. Anquanto s’arrojaba l forno, cun uns balientes braçados de lheinha, habie que ranhar l forno cun l ranhadeiro i spargir l borralho para todos ls canticos de l forno para quedar todo l suolo bien roijo. Quando l cielo de l forno stubisse yá anclariado, amuntonaba-se l borralho cul rodo i çpejaba-se na fornalha. Para cunfirmar zimbraba-se ua manada de farina, par’andrento l forno i, se l forno stubisse bien roijo, eilha ardie lhougo nun claron. Nesse antretiempo iba-se fenhindo, cun la rapadeira cortaba-se la massa i ambolbie-se an farina, fazien-se las bolas pa las las fogaças i quedában stendidas an riba de l lhençol ne l strado, aspera que l forno s’arrojasse. A la boca de l forno quedaba algun borralho aonde ardien uas menudicas para se ber meter l pan i le dar buona quelor. Ponien-se las bolas an riba de la pala anfarinada i stendien-se bien amanhadas por todo l spácio de l forno. Se l forno nun stubisse bien roijo, tapaba-se lhougo para nun çcair la rojura. Antes de l tapar, tie Angrácia nunca se squecie de dezir la questumada ouraçon: “San Juan faga bun pan, San Bicente l’acrecente! An nome de l Padre i de l Filho i de l Sprito Santo, amene!”
Anquanto iba tomando cunta la quelor de las fogaças, la tie Angrácia rapaba ls pegotes que quedában agarrados a la amasseira i barrie-los cun la scobielha, feita de barciego, i aporbeitaba aqueilhes grulicos de massa i réstios de farina para le dar a las pitas ó als cochinos. Ua hora apuis, cun la staca, sacaba las bolhas para dar als garoticos i só passado un cachico ye que tiraba las fogaças.
Alguas fogaças, a las bezes, quedaban scachadas i cun tetos, era cierto i sabido que la massa habie agarrado friu, mas las fornadas de la tie Angrácia quedaban siempre buonas i cu l pan mi saberoso.
Hoije tie Angácia yá nun fai pan, só acende l forno pula Páscoa para fazer ls folares, la bollha doce i nas fiestas para fazer uns rosquitos i uns sodos.
Alcina Pires