L’ouparaçon

Fui-se para alhá ne l die cumbinado, i las cousas nin ampeçórun mi mal. Dixo l nome, para ber s’era l que staba ne l livro de las antradas, i ua anfermeira andicou-le l quarto. Ponei-bos a buntade, que alguien bos ha de traer la cena. Ficou-se pali ambuolto ne ls sous pansamientos, que na berdade andában rebuoltos. Bino ua tie cun la cena, dixo poucas palabras, mas fúrun amerosas.
La nuite passou-la culs uolhos abiertos, só pula purmanhana l suonho l banciu, mas nun l sossegou. Anquanto drumie, sonhou qu´iba a arresbalar por ua lhadeira, i dou un salto antes de chegar l fondo.
Eran para ende las dieç quando ua doutora inda nuoba bieno a falar cun el. Chegou-se an pie, santou-se nua cadeira i ampeçou-le a dezir, qu’era neçairo fazer uns eisames para çcubrir l que l’andaba a preocupar. Falaba cua boç suable i iba streitando la çtáncia. El staba un cachico assustado cul çcunhecido, i fui ende que la doutora le pegou na mano i l’apertou un cachico, dezindo-le al miesmo tiempo, Todo bai a correr bien, tu mereces isso. Saliu deili, i cerrou la puorta.
Ne l die adelantre, benírun-le a dezir qu´iba a ser ouparado, mas la doutora habie de falar cun el.
El habie gustado deilha. Nunca naide assi de repente le falara daqueilha maneira.
L’ouparaçon corriu bien, i pulas mesmas dieç horas de soutordie, alhá staba la doutora outra beç. Santou-se al pie del, i sin palabras boltou-le a pegar na mano. Anton ampeçou:
- Curriu todo bien, mas çcunfiamos que tenemos que tornar a mexer.
- Mas porquei?, scapou-se-le la pregunta.
Eilha nun le arrespundiu lhougo. Bie-se bien que staba a adundiar las palabras. Nun podemos ficar cun dúbedas. Manhana tenemos que tornar a l’ouparaçon.
Quando spertou, desta beç biu todo mui anubrado, antandiu que habie sido lhargo l tiempo de l´anestezie. Pesaba-le la cabeça, santie-se mui fraco, las piernas i ls braços stában pali abandonados. Tenie un delor, sien l santir, parecie que benie dun buraco sin fondo. Ls uolhos abrien-se i cerrában-se, i el nun ls cuntrolaba, era cumo se nun fússen del, cumo s´el nun fura naide. Quando tornou a abrir ls uolhos, staba al pie del la doutora. Pegou-le na mano, zbruçou-se para el i dou-le un beiso. Ficou eili, de uolhos abiertos anté qu´estes s´anchírun d´auga, i tubo que la deixar correr. Fícorun ls dous calhados, i deixou de santir aquel poço sin fondo.
Dixo la doutora, Bá!, nun fui fácele, mas cunseguimos.
El nun tubo palabras.
Todos ls anhos, Américo ten un die para besitar la Doutora, mesmo que seia solo por un minuto.

Válter Deusdado