A mi cuntórun-me-lo...

Quien mos las cuntaba a nós, ls de la mie criaçon, yera tiu Zeferino Guedeilhas quando mos agarraba de jolda al redor de l lhume, las de las bruxas anté las rapazas las podien oubir, solo las burmeilhas ye que yá sabien: ide-bos a ber se buossa mai stá a fregir uobos cun palha.
- Chegai-bos parqui...
la boç mui baixica i siempre cun la caiata a zenhar garabatos manginários an la cinza de l burralho, la prisquica a recalcinar-le ls beiços, cumo se yá habisse nacido cun eilha ambaixo de las narizes, i la guedeilha de la nomeada a spreitar-le por baixo de la gorrica spanhola que sou pai le habie traído de l Cabeço de la Lhuç, inda Guedeilhas yera garoto.
- Cuntaba-se datrás...
yera cumo siempre ampeçában las cuontas de tiu Guedeilhas, cumoquiera que a purparar l fecho que tamien nunca mudaba muito:
- A mi, cuntórun-me-lo, nun sei se serie berdade...
Cumo aqueilha de la pita, que nun deixaba ls trilhadores assossegados, ls tius a querer trilhar la parba i la pita a sbolaciar porriba deste i daquel, a spantar las bacas, bai Balmiro Cuco - yá nun lo coincistes, fui-se pa l Brasil – speta-le cun l cabo de la spalhadoura, solo le chiçcou por ua ala, i quaije deixaba la pita ne l sítio, cá, cá, rá, cá, alhá zaparciu. Soutordie a la purmanhana, la tie..., tamien yá nun la coincistes, nun amporta, passa por un lhato d’auga a la Fuonte de l Bal, que te passou?, que nun te passou?, nun ye nada, dei un bolco an la cozina, quedou-me l braço ambaixo dun rachon... l causo ye que la tie lhebaba un braço cobrado, çpindurado cun lhenço de l cachaço, you nun ye por tal, you nun bi, fui tiu Guedeilhas que me la contou, nun sei se serie berdade...
Tiu Guedeilhas bien sabie l que dezie quando amentaba an bruxas: bien feitas las cuontas, habie stado casado cun ua mais de trinta anhos. Se pensais que las bruxas son siempre ties bielhas, zbalidas i que bíben solas, stais bien anganhados.
Bou-bos-lo a cuntar, purmeiro antre dientes, apuis a la boca chena. Medrou ne l pobo un belouro mui fuorte: la de l Guedeilhas tamien ye de las que béilan puls balhes, tamien oulia ne ls córrios, la de l Guedeilhas isto, la de l Guedeilhas aquilho, you anté arrodeio solo pa nun tener que le cruzar l oulhar...
Tiu Guedeilhas nunca tenie oubido nin çcunfiado de nada. I tamien, cumo poderie el, cun ua almica mais branca que las einaugas benidas de l poço de lhabar, çcunfiar que la tie que le fazie l caldo i cun quien se deitaba todas las nuites?! Asperaba que el se drumisse pa salir a beilar i a tocar ls lhatos, ende por esse termo, nunca sin antes benezir a Guedeilhas cun las nalgas porriba de la cabeça de l tiu, a fazer cruzes:
You te benzo cul miu culo,
You te benzo cul miu todo,
Anté que you nun benga de la mie jornada,
Tu nun te spertes deste suonho.
Quijo l demonho que tiu Guedeilhas, un sábado a la nuite, apuis de aquemodar la cria, al antrar an casa de Casemiro - adonde ls homes íban a fazer la barba pa Demingo poder ir a ber a Dius -, oubisse la sentença que le haberie de drobar las cuostas i ambaciar l oulhar para siempre:
- ...la de l Guedeilhas...tamien le gústan ls córrios i ls fados que alhá fáien cul zangon!
Yá nun antrou. I naide sabe cumo tubo fuorças pa chegar a casa i nun çfazer la sue tie a porradas. Mas nun passarie dessa nuite. Cumo fusse berdade, iba-le a quedar l die nomeado.
Puso ua guelhada ambaixo de l catre, deitou-se i fizo-se drumido, mas nun çfechou uolho toda la nuite. Nin nessa, nin an las trés nuites apuis. I cumo se habie de drumir cun aquel fierro roijo a sfuracar-le l’alma? A la quarta nuite, ya passarie de las onze, sentiu la sue a rebolber-se debagarico porriba del ne l catre. Deixou-la botar la bençon anté l fin i quando çcerrou ls uolhos solo biu uas nalgas porriba de la cabeça. Peç que se le anubrórun ls uolhos i anté le terrincórun ls dientes. Dou un brinco cumo un chibo – á, tu gustas de beilar, aspera que you te toco la caixa! - i botou la mano a la guelhada. La tie, chimpada ne l chano, nun paraba de boziar, á mai! á mai!, l home stá çfigurado, dá-me ua túndia que me zburraça. I mais boziou quando tiu Guedeilhas le assentou la purmeira guelhadada an las nalgas, anquanto, agora el, tamien la repunsaba:
You te benzo l tou culo,
Cun esta mie guelhada,
Pa que l tou culo nun torne
A benezir la mie cara!
Nun se tornórun a falar, mas nunca deixórun de bibir an la mesma casa - i adonde staba outra? -, las quatro baquicas, las cuontas ne l soto i l cochinico apartados, l cochino solo apuis de muorto, bien antendido, catre nunca antrou outro naqueilha casa, bá!, mas isso agora nun anteressa, bamos-mos a calhar, yá se morrírun ambos a dous, el purmeiro, eilha yá tenie quaije nobenta anhos. Pouco tiempo antes de se morrer inda diç que la bien a antrar an casa de madrugada, un cachico antes de nacer l sol, ua tie de nobenta anhos, you isso nunca bi, a mi cuntórun-me-lo, nun sei se serie berdade...
Alfredo Cameirão