Trato cua bruxa

Antre l fosco i l clareio de l lhunar zlhumbrou-se eili bien al pie del ua pita que, de mansico, s’achegaba a las sues canhonicas.
"Home essa, you nun acredito ne l que beio! A estas horas de la madrugada i tan loinge de l'aldé ua pita, s’eilhas anté son pitosgas a la nuite?!"
Nun se cuntubo i atirou-le ua baliente arrochada cula caiata, cobrando-le ua pata a la pita. Nistantico la pita birou-se nua tie toda znuda. Tiu Miguel quedou de boca abierta, mi assustado i ambasbacadico, sin palabras i sin jeito, dando muostras d’arrependimiento. L que biu a la sue frente fui ua pita, agora habie ua tie znuda dando ais agarrada a ua pierna. L çfarçe falou-le cun doçura na boç:
- Miguel assossega, inda nun sou nanhua alma de l outro mundo. I, an beç de stares ende specado, tapa-me cula tue capa. Bin sin bestes porque achei que nun me fazien falta.
L pastor tapou-la, agarrou-la al cuolho i lhebou-la pa la sue cabanha adonde la tratou mi bien, mas siempre mui acanhado pus an toda sue vida nun habie muitas abinturas cun ties znudas. Siempre lhamuriando-se que l que el biu fui ua pita i nun ua tie. Mas astrebiu-se i percurou-le:
- Mas tu l que sós? Cacarejeste cumo ua pita i sós ua tie an pelo i uosso?!
Eilha respundiu-le, yá cumo ua tie:
- Mira sou ua bruxa. Çpuis de la meia nuite nun assossego an mie cama, lhebanto-me i salgo, badiando por caminos i ancruzilhadas deste termo. Solo quedo bien çpius de lhebar la nuite fazendo mal i zgraciando ls outros. Esta nuite staba cul tino an fazer ua bruxarie al tou ganado, íba a ser la tue beç de spurmentar l que las bruxas son capazes de fazer. Maldita sina la mie, mas tu deste por eilha a tiempo. Agora eiqui stou a cuntar-te todo, i tu yá nun dás muostras de miedo, anté me parece que gustas de mi. Pus mira, nin todo l que se diç por ende de bruxas ye malo! An pagas gustaba de fazer un trato cuntigo por todo l que stás a fazer por mi. Tu bás a guardar segredo, i you nunca te fago mal nin las outras bruxas s'astríben. Quedas ambaixo la mie porteçon. Bas a ber que anquanto andubires por este mundo la cousa melhor que hai ye tener ua bruxa cumo amiga.
Tiu Miguel acordou todo l que la bruxa treminou. Quien nun l fazie, çpuis de todo l que se cunta subre la fuorça deilhas!? L afertunado pastor nunca mais biu la bruxa, mas recebiu na cabanha, a cobierto de la nuite, muitas bezes la besita de la tie, que chegaba siempre bestida. La bida de l pastor era tan buona i iba tan bien que n'aldé yá todo mundo lo ambejaba, dezindo que el debie de tener un trato culas bruxas.
Tiu Miguel muorriu-se de belhico. Acá quedou ua tie que agora to las nuites s’afogaba an lhágrimas.
Faustino Antão