La cunsemiçon de l çapateiro

Alhá se achegaba el cun aqueilha mesa quadrada a las cuostas, squesita, cun un rebordo na parte de riba, adonde s’ambaralhában las mais stranhas ferramientas. Alguas deilhas até se podie dezir que parcien deformadas, tan stranho era l feitiu que tenien.
L sítio era l de todos ls anos, ambaixo de l cabanhal, que era un lhugar assossegado. Ampeçaba-se por fazer l lhume que tenie que durar l die todo. Çpuis, purmeiro ls filhos, lhougo a seguir ls pais, cun meias nuobas ou lhabadas, ponien l pie an riba de la suola, pa l çapateiro fazer l zeinho de l pie de cada un. L trabalho alhá iba andando a un ritmo algo ancierto, que parecie que l die acabarie sin que ningun de ls çapatos quedasse pronto.
Chegaba la hora de l almuorço, i la boç de la tie Adelina chamaba l çapateiro Antonho Pina para almorçar. A la mesa, era agora tiempo de preguntar pul filho, que nacira cun defeito nua pierna, que nun l deixaba jogar cumo ls outros garotos.
L miu Luís?, alhá stá. Aqueilha pierna tuorta, nun ten maneira de s’andreitar. Custa-le a andar, manca muito. Ye un triste. Anquanto la mai podir tratar del, stá todo bien, çpuis... çpuis....i calhou-se.
La tie Adelina achou por bien demudar de cumbersa, i falou de ls tiempos malos que l Mundo bibie. L çapateiro que ficaba muitas bezes solo, mesmo quando trabalhaba, nun tenien sido poucas las bezes, que çcarregaba cul martielho na suola, la rebuolta de tanta andifrença, tanta zeigualdade. Era tiempo de bolber l trabalho i atiçar l lhume pa l restro de l die.
La garotada, que nun tenie scuola, als poucos iba-se ajuntando a la buolta de l lhume, i cul friu que fazie, cada beç stában mais an riba de l lhume, nun deixando que l çapateiro se calçisse. Habie anton chegado la hora de agarrar la subela para ampeçar a coser ls çapatos. Meti nas manos a modo uas lubas an cabedal, aparcidas a las de un cundutor de corridas de altemobles, mas era solo para que l filo nun cortasse las manos quando se fazie fuorça para apertar ls puontos. Nun géstio lhargo, de perpósito, cun las dues manos, apanhaba la garotada çtraída i anton era cumo ua parede a sbarrulhar-se, cada un a cair para sou lhado, deixábam outra beç l campo todo pa l çapateiro.
L die ampeçaba a cair, i ls pares de çapatos, an fases defrentes de acabamiento, tenien que cuntinar a soutordie.
A la mesma hora alhá staba l çapateiro ne l sou campo, ambolbido cun las formas, las subelas i aqueilhas ferramientas squesitas que só el sabie para que serbien. De repente, ua bozearie chega-le als oubidos, i als poucos bai çtrinçando que se trata de la mulhier que se caíra ne l camino, quando bolbie de la fuonte. Cuorre para alhá, mas quando chega la mulhier staba muorta. Morrira-se nistante, naide podie fazer nada.
Feito l antierro, l çapateiro ten que ficar por casa, para tratar de l filho deficiente que quaije nun puode andar, i nin bai a la scuola. L çapateiro nunca mais pudo salir de casa, bai trabalhando eili, mas pouco, que l’eidade yá le bai pesando. L filho manco ye que nun le sal de la cabeça, l que eirá a ser del quando el se morrisse? Screbiu-le al único armano bibo, qu’era eimigrante ne l Canadá. Gilberto pormetiu-le que s’acauso algua cousa acuntecisse, el lhougo benerie a buscar l sobrino, i tomarie cuonta del.
Nun tardou muitos anhos que la salude de l çapateiro s’amalinasse, acabando na sue muorte.
Gilberto, mal soubo la notícia, puso-se al camino, mas quando acá chegou, l armano yá habie sido anterrado. Quando saliu de l carro de praça que l habie lhebado i anchiu ls pulmones cun l air de l´aldé adonde nacira, l cheiro fuorte de quarenta anhos loinje anchírun-le ls uolhos d’auga. Un remolino de sensaçones ambadiu-le l´alma, i eili ficou heipnotizado. Solo l rugido de l táxi a ir-se ambora l sacudiu daquel ancantamiento. Inda antes de ber l sobrino, ya habie resolbido que nun bolberie pa l Canadá.
Válter Deusdado